नेपालमा क्रिकेट खेलिरहेको फोटोलाई भारतको सन्दर्भ जोडेर यसरी भ्रामक बनाइयाे

Injina Panthi / शुक्रबार, जेठ १४, २०७८

पहाडको एक कुनामा रहेको खेतमा केही युवाहरूले क्रिकेट खेलिरहेको एउटा तस्बिरलाई भारतको सन्दर्भ जोड्दै सामाजिक सञ्जालमा सेयर भइरहेको छ । ट्विटरमा १६ लाख फलोअर्स भएका भारतको एक व्यापारिक समूह आरपिजी इन्टरप्राइजेजका अध्यक्ष हर्ष गोयन्काले आफ्नो प्रमाणित खातामार्फत् उक्त फोटोसहित ट्विट गरेका छन्।

गत जेठ १३ गते उनले आफ्नो ट्विटमा लेखेका छन्: “भारतमा क्रिकेट एउटा खेल होइन, यो धर्म हो । त्यस्तो धर्म जसमा क्रिकेटरहरू भगवान हुन् र हरेक जित एउटा उत्सव हो।” उनको उक्त ट्वीट जेठ १४ गतेसम्म दुई हजारभन्दा बढीले लाइक गरेका छन् भने १६० भन्दा बढीले रिट्विट एवं उद्धृत गर्दै सेयर गरेका छन्।

उनले उक्त तस्बिर सेयर गरेपछि त्यस ठाउँबारे सामाजिक सञ्जालमा जिज्ञासा व्यक्त भएको छ। केहीले त्यो तस्बिर नेपालको भएको प्रतिक्रिया जनाएका छन्।

३ लाखभन्दा धेरै फलोअर्स भएको श्रीलंकन क्रिकेट फ्यान्स फेसबुक पेजमा समेत उक्त तस्बिर गत जेठ ३ गते ठाउँ नखुलाई पोस्ट गरिएको थियो ।

फ्यान अफ क्रिकेट भन्ने १० हजार फलोअरस् रहेको फेसबुक पेजले सुरुमा भारतको हिमाञ्चलको फोटो भनेर पोष्ट गरेपनि पछि सच्याएको छ।

जसका प्रतिक्रियामा त्यो नेपालको भएको भन्दै प्रयोगकर्ताहरूले लेखेका थिए।

तथ्यजाँच

सो तस्बिरबारे बुझ्ने क्रममा साउथ एसिया चेक एउटा फेसबुक समूह ‘नेपाली क्रिकेट सपोटर्स सोसाइटी’ सम्म पुग्यौं। उक्त तस्बिर खिचिएको स्थान प्युठानको मल्लरानी भन्दै गत वर्ष साउन २४ गते पहिलोपल्ट पोष्ट गरिएको छ।

उक्त समूहमा पोष्ट गर्ने क्षितिज श्रेष्ठलाई हामीले सम्पर्क गर्यौ ।

उनले उक्त फोटो २०७७ साल साउन ७ गते खिचेको बताए। हामीले उनले पठाएको तस्बिरको विवरण अध्ययन गर्दा उक्त तस्बिर सोही मितिमा खिचिएको पायौँ ।

श्रेष्ठले भने, “हामी आफैले आयोजना गरेको खेलको फोटो हो त्यो।”

यिनै विवरणका आधारमा उक्त तस्बिरको स्थान/सन्दर्भ र त्यसको सर्वाधिकार एवं श्रेय स्पष्ट नपार्दा त्यसले भ्रमहरू सिर्जना गरेको देखिन्छ।

यस सामग्रीको सर्वाधिकार पानोस दक्षिण एशियामा रहेको छ । तर southasiacheck.org बाट लिइएको भनी यस सामग्रीलाई उपयोग गर्न सकिनेछ ।

प्रतिकृया दिनुहोस